Albisteak

Bergarako Udalak martxoaren 28an ospatuko den Erramu Zapatuko Feriaren antolaketa abian jarri du, eta dagoeneko argitaratu ditu Eusko Label produktuen txosna, talo txosna eta artisautza zein elikagai postuen esleipenerako oinarri eta baldintzak.

Feria egun osoak honako kokalekuak hartuko ditu: San Martin plaza, Seminarioko patioa, Ibargarai hiribidea eta Simon Arrieta plaza, 9:30etik 14:30era.

Eusko Label produktuen txosna – Eskaerak martxoaren 4ra arte

“Eskolan sukaldea daukagu eta orain zer?“ jardunaldia ospatuko da urtarrilaren 31ean Bergarako Udaletxeko pleno aretoan. Jardunaldi hau hezkuntza-komunitateetako eta tokiko erakundeetako kideei zuzendua dago eta beronen bidez lehen hurbilketa egin nahi da eskola-jantokien kudeaketa deszentralizatuari.

Bergarako Udalak 2026ko Aurrekontuak onartu ditu astelehen honetan ospatutako osoko bilkuran. Guztira, 33.035.135 euroko aurrekontua izango du Udalak urte honetarako, Horietatik 32.478.000 milioi euro Udalaren beraren aurrekontuari dagozkio; 560.036 euro Euskaltegiari; 500.000 euro Bihargintzari eta 5.000 euro Mizpirualderi.

Bergarako Udalak udalerria Etxebizitza Merkatuko Tentsio Eremu izendatzeko eskaera Eusko Jaurlaritzari bidaltzea onartu berri du asteazken honetan ospatutako Lurralde Batzordean. Neurria azken hilabeteetan egindako lan sakon baten emaitza da, eta etxebizitza eskuragarritasuna hobetzeko politika publikoak indartzea du helburu.

Urtea hastearekin batera, martxan da Debagoieneko Energia Bulegoa; herritarrei informazioa eta aholkularitza emateko prest. Argindarraren edota gasaren fakturaren inguruko informazio emango zaie herritarrei, baita elektrizitate eta gasaren merkatu arautuen zein libreen gaineko xehetasunak ere.

Bergaran kokatutako ALKAR Lankidetza Guneak espazio bat eskaintzen du Debagoieneko eta Bergarako ekintzaileentzat, euren negozio-ideiak garatzeko eta elkarlanerako aukera berriak sortzeko helburuarekin. Momentu honetan, bertako bi bulego daude libre, herritarren eskura jartzeko prest.

Espazio hau Bergarako UNED eraikinean dago kokatuta, San Martin plazan, eta coworking edo lankidetza ereduan oinarritutako lan-ingurunea eskaintzen die ekintzaileei. Helburua da sinergiak sustatzea, ezagutzak partekatzea, elkarrekin ikasteko aukerak eskaintzea eta harreman profesionalak sendotzea.

Agorrosingo igerilekuko teilatua berritzeko lanak amaitzear daude, eta, ondorioz, urtarrilaren 24tik aurrera instalazioko barruko igeritoki biak berriro zabalik izango dira ohiko zerbitzuarekin.

Lan horien azken fasea behar bezala burutu ahal izateko, urtarrilaren 22an eta 23an (osteguna eta ostirala) igerileku txikia itxita egongo da.

Urtarrilaren 24tik aurrera, berriz, erabiltzaile bakoitzaren kuotari dagokion zerbitzu arrunta berreskuratuko da.

Gipuzkoako diputatu nagusiak, Eider Mendoza Larrañagak, eta Bergarako alkateak, Gorka Artola Alberdik, Ongizatearen Plaza ireki dute ostegun honetan Bergarako Seminarixoan. Goiz eta arratsalde, ongizate integralaren inguruko hainbat solasaldi, mahai-inguru eta jarduera parte hartzaile hartuko ditu Foru Aldundiak antolatutako espazio berritzaile honek. Hala nola, zahartzaro osasuntsua, ariketa fisikoa, buru osasuna, inklusioa, elikadura jasangarria eta teknoadikzioa izango dituzte aztergai eta mintzagai datozen bi egunotan.

Elgoibarko Txillarre baserria izan zen Euskal Herriko azken hamarkadetako mugarri historiko baten agertokia: ETAren jardun armatuari amaiera emango zion prozesuaren abiapuntua. Testuinguru horretan kokatzen da Txillarreko sukaldaria dokumentala, pertsona jakin baten bizipenetatik abiatuta memoria historikoa, elkarrizketa eta giza harremanak ardatz dituen lana.

Dokumentala eta ondorengo solasaldia urtarrilaren 20ean, asteartean, ospatuko da Seminarixoan, arratsaldeko zazpietatik aurrera.

Datorren astelehenean, urtarrilaren 12an, Bergarako hainbat espaloitan ez labaintzeko tratamendua emango da, oinezkoen segurtasuna hobetzeko helburuarekin. Lanak enpresa espezializatu batek egingo ditu, eta gaueko ordutegian gauzatuko dira, eguneroko erabilerari ahalik eta eragin txikiena egiteko.