webmaster-k Al, 2026-03-02 09:42-n bidalia
Bergarako Udalak eta Olaso Dorrea Fundazioak jakinarazi dute Xare Álvarez Berakoetxea (Donostia, 1990) izango dela 2026ko Monzon-Ganuza Sariaren egilea. Eskultore donostiarraren ibilbide sendoa, hizkuntza plastiko propioa eta formaren eta materialaren inguruko ikerketa etengabea izan dira epaimahaiaren erabakiaren arrazoi nagusiak.
Álvarez Berakoetxea Arte Ederretan lizentziatua da Euskal Herriko Unibertsitatean nahiz École Nationale Supérieure des Beaux Arts-en (Paris). Bere lana nazioarteko eta estatuko instituzio esanguratsuetan erakutsi du, besteak beste:
• San Telmo Museoa: Pliegue/Makurtu (2024) eta Baginen bagara (2021)
• Galería La Taller (Bilbo, 2023): Nudo, Urdimbre, Hilván/Lotune
• Galería Altxerri (Donostia, 2022): Pulso
• Tabacalera (Madril, 2020)
• Guggenheim Bilbao Museoa: EGINBERRI programa (2017)
• Azkuna Zentroa (Bilbo, 2018)
• Bestelako espazioak: Bel Ordinaire (Pau), CAC La Synagogue de Delme (Frantzia), Koldo Mitxelena…
Sari eta aintzatespen ugari jaso ditu: Ourenseko Diputazioaren Arte Plastikoen Lehen Saria (2013), INJUVEren laguntza (2017), Gipuzkoako Foru Aldundiaren Sorkuntza Artistikoaren Egile Sariak (2022) eta Eusko Jaurlaritzaren arte plastikoetarako hainbat dirulaguntza.
Bere praktika eskulturaren arloan kontzentratzen da, abstrakzioaren, forma organikoen eta materialen eraldaketa poetikoaren inguruko ikerketan oinarrituta.
Aurtengo sarirako proposatutako pieza uhin formako eskultura organiko bat da, ehunduraren eta mugimenduaren arteko elkarreraginaren emaitza.
Lanak hormatik irteten den elementu bizidun baten itxura du:
• Bi tolestura nagusitan antolatutako forma dinamikoa,
• Mugimenduan gelditutako ehun baten antza,
• Barrurantz doan hutsune bat, ikuslearen begirada erakartzen duena.
Epaimahaiak nabarmendu du piezak espazioarekiko harreman bizia eta Xare Álvarezen praktikan ohikoa den prozesuaren dimentsio poetikoa uztartzen dituela.
‘Monzon-Ganuza 2026’ sari banaketa martxoaren 10ean ospatuko da Bergarako Seminarixoan, eta aurtengo saritua Miguel Castells abokatu historikoa izango da.
