Bergarako Udala-k Ar, 2017-09-05 17:22-n bidalia
Berriketan programa Udaleko Euskara Zerbitzuaren, udal euskaltegiaren eta Jardun euskara elkartearen ekimena da, 2006an sortutakoa. Horren helburua da euskara maila hobetu nahi dutenak edo euren inguruan euskaraz berba egiteko aukerarik ez dutenak euskaraz hitz egiten dutenekin elkartu eta hala mintzatzea erraztea.
Praktikatu nahi dutenek euskaraz berba egiteko gutxieneko maila bat izan behar dute. Bestalde, laguntzaile izateko izena ematen duten euskaldunek ez dute irakasle papera hartu behar, nahikoa baita era naturalean eta pazientzia apur batekin euskaraz jardutea. Izena ematen dutenei libre dituzten ordu eta egunen berri galdetzen zaie eta koordinatzaileak 3-4 pertsonako taldeak antolatzen ditu eta astean ordubetez euskaraz berba egitea da helburua (kafea hartzen, paseatzen…). Eta dena diru trukerik gabe egiten da, doan. Kontuan izan edozein edadetako pertsonak parte hartu dezaketela, adin aniztasun hori ere oso aberasgarria da eta.
Bestalde, Auzoko izeneko programa euskara batere ez dakitenei zuzenduta dago; tartean beste herrialde batzuetatik etorri berriak eta beste batzuk urteetan Bergaran bizi arren, euskararekin oso harreman txikia dutenak. Egitasmo hori Jardun euskara elkarteak jarri zuen martxan 2009an, Udaleko Euskara Zerbitzuaren laguntzarekin.
Programa honetan parte hartzeko ere ez da ezer ordaindu behar eta, printzipioz, astean behin talde txikitan elkartu eta euskara ikasteko lehen urratsak ematen dira. Horrez gain, astean behin elkartzeaz gain, nahi dutenak herrian izaten diren aisialdiko ekintza batzuetan ere parte hartzeko laguntza ere izango dute, integraziorako bideak erraztuz.
Egitasmo honetan euskara ez dakiten pertsonez gain, herritar euskaldun batzuk ere parte hartzen dute, laguntzaile modura. Hori dela eta, euskaldunak eta euskara ez dakitenak parte hartzera animatu nahi dituzte. Asteroko bileratan koordinatzaileak dinamika ludiko batzuk proposatzen ditu eta dinamika hauetaz baliatuz euskarara hurbildu eta ezagutzeko aukera eskaintzen da. Euskarri gisa, besteak beste, 20 hizkuntzatan prestatutako hiztegitxoak erabiltzen dira (http://www.hizkimizki.com/).
Berriketan edo Auzoko programan parte hartzeko zein informazioa eskuratzeko, Jardun euskara elkartearekin harremanetan jarri behar da.: Errotalde jauregia / Kultur Etxea, edo honako telefono zenbakietara deituta, 943 76 36 61 edo 605 71 24 69.
