Bergarako Udala-k Og, 2025-01-30 12:30-n bidalia
Duela bi urte martxan jarritako Adineko Pertsonen Kontseiluak aurrera darraiela azaldu du Bergarako Udalak, eta horren adibide da otsailaren 13an ospatuko den hurrengo bilera. Izan ere, orain arte egindako lanaren ostean, aurten, azken kontseiluan aukeratu ziren bi gai nagusi landuko dira: bakardadea eta etxebizitza. Horrez gain, beste bi gai ere jorratuko dira: informazioa helarazteko boletin baten beharra eta ekintza bateratuak.
Hurrengo bilera otsailaren 13an izango da, 17:30etik 19:00etara, Udaletxeko pleno aretoan. Bertan, orain arte egindako lanaren aurkezpena egingo da, eta bakardadearen eta etxebizitzaren gaiak landuko dira taldeka. Halaber, boletin baten beharra eta ekintza bateratuak aztertuko dira. Ekintza bateratuen artean, Belaunaldien Arteko Nazioarteko Eguna (apirilak 29) eta Adineko Pertsonen Nazioarteko Eguna (urriak 1) ospatzeko jarduerak proposatuko dira.
Adineko Pertsonen Kontseiluak, bere ibilbidean zehar, hainbat ekimen sustatu ditu Bergaran, adinekoen bizi-kalitatea hobetzeko asmoz. Besteak beste, bakardadea arintzeko programak eta etxebizitza egokitzapenerako aholkuak eskaini dira. Horrez gain, informazioaren transmisioa hobetzeko boletin baten beharra identifikatu da, eta belaunaldien arteko harremanak sendotzeko ekintza bateratuak antolatu dira.
Bergarako Udaletik bertan parte hartzeko gonbidapena luzatu dute: “Beste belaunaldi batzuek egiten duten bezala, garrantzitsua ikusten dugu adineko pertsonek ere beraien topaleku bat martxan jartzea, izan ere, bizitza guztian jasotako esperientziak bergarar guztiontzako oso aberasgarriak izan daitezke”, adierazi du Gorka Artola alkateak.
