Albisteak

1.993ean Oxirondo azokarako onartutako erregelamendua gaurkotu asmoz, Bergarako Udalak honen eguneraketa onartu du astelehen honetan ospatutako osoko bilkuran. Erregelamendu berritu horri esker, instalazio horiek gaur eguneko beharretara egokitu ahalko dira, espazioa erabilera berrietarako erabiltzea ahalbidetuz.

DG2030 egitasmoaren barruan dagoen IKASTETXEKLIK proiektuaren ikasturte honetako itxiera saioa ospatu da duela egun gutxi.

IKASTETXEKLIK energiaren kontsumoa murrizteko proiektua da. Bertara proiektuan parte hartu duten eskualdeko ikastetxeetako ordezkariak joan ziren. Bergarako kasuan Aranzadi ikastola, Mariaren Lagundia ikastola eta San Martin eskolako ordezkariak.

Maite Usabiaga zinegotziak ikasleei banatu zizkien errekonozimendu ziurtagiriak. Zorionak egindako lanagatik!

Bergarako Udalak eta herriko musika taldeek martxan jarritako ‘Loratzen’ diskoari jarraipena eman asmoz, larunbat honetan, ekainaren 15ean, zebait musika talde bergararrek kontzertuak eskainiko dituzte herriko txoko ezberdinetan.

13:00etan, Irizar jauregiko atzealdean, Diablues eta Bluezifer Band, Sin Ruta eta Add Blue taldeak arituko dira. 17:30ean, leku berdinean, DBQ, Golden Blues eta Hegazkin-en txanda izango da, eta, bukatzeko, 22:00etatik aurrera Fango, Azkaiter Pelox eta Orhi arituko dira Seminarixoan.

Bergarako Udalak klima-aldaketa arintzeko eta BEG isuriak murrizteko balio izango duen ‘Bergara 2030 Bizi energia’ klima eta energiari buruzko Tokiko Plana aurkeztuko du datorren asteartean, ekainaren 11n, Olaso Dorrean 18:00etatik aurrera. Ekitaldia herritar eta eragile ezberdinei irekia izango da, eta bertan datozen urteetarako erronka zein lan ildoak aurkeztuko ditu.

Uda giroa gerturatzen den heinean, Bergarako Udalak uda sasoian aisialdiaz gozatzeko aukera eskaini nahi die bergararrei. Hori dela eta, ostiral honetan irekiko ditu Agorrosingo kanpoko igerilekua eta iaz Labegaraietan inauguratu zen ur parkea.

2024. urteko San Martzial jaietan zelaian irekiko den kantinaren eta jarriko den txosnaren ustiapena adjudikatzeko deialdia ireki berri du Bergarako Udalak.

Bergarako Oxirondo azoka berrizteko lanak bukatuta, astebururo bertan bildu ohi diren baserritar eta saltzaileak bertara itzuliko dira larunbat honetan. Modu honetara, lanek iraun bitartean erabili izan duten karpatik eraikin barrura sartuko dira, eta ohiko martxara bueltatuko dira. Horrez gain, Elikaeneako horniketa lanak uztail erdialderako bukatuko direla aurreikusi dute udal arduradunek, beraz, hori gertatu ostean, Oxirondo azoka berriztuaz gozatzeko aukera izango dute bergararrek.

Ekainaren 30ean ospatuko den San Martzialgo erromeria dela eta, Bergarako Udalak mahaiak eta aulkiak alokatzeko epea irekiko du datorren astetik aurrera. Zehazki, materiala alokatu nahi duenak ekainaren 5 eta 12an (asteazkenak) Seminarixoko leihatilan egin ahalko du 18:00etatik 20:00etara bitartean. Mahai batentzako eta zortzi aulkirentzako prezioa 25 eurotakoa izango da.

Eskatzaile bakoitzak:

- 150€ FIDANTZA jarri beharko du 3 mahai arte. Hortik gora eskatuz gero 300€ (hau da, 4 edo 5 mahai, 300€ko fidantza jarri beharko du).

Bergarako Emakumeentzako Jabekuntza Eskolak interesa duten emakume guztiak gonbidatu nahi ditu datorren ostiralean, ekainak 7an, 18:00etatik 20:00etara bitartean Irizar jauregian egingo den ikasturte amaierako topaketara.

Bergarako Udalbatzak Udalbiltzaren Kontseilu Nagusiarekin bat egitea erabaki du astelehen honetan egindako osoko bilkuran. Erakunde nazional honen helburua Euskal Herriaren garapena eta barne kohesioa bultzatzea da.