webmaster-k Og, 2025-06-19 13:56-n bidalia
Museoaren sarrerako lorategian, harrituta uzten gaitu azken hilabeteetan protagonista bihurtu den landare ikusgarriak: Agavea.
Hainbat espezie daude, baina denek dute bereizgarri hosto lodidunak, zorrotzak eta arantzak dituztela, eta urte asko igaro ondoren, loratzen direnean, ikusgarri bihurtzen dira.
Agave gehienek bizitzan behin bakarrik loratzen dute: hainbat urtez (batzuetan 10 eta 30 urte artean) hazten dira, energia metatzen dute, eta prest daudenean, lorezko adar erraldoi bat hazten zaie, argazkian ikus daitekeen bezala.Prozesu hau monokarpikoa deitzen da: loratu ondoren, landare nagusia hil egiten da, baina sarri kimu berriak ematen ditu, bizitza zikloa berriz hasiz.
Ameriketatik etorritako landare hau aspalditik erabiltzen du gizakiak. Mexikon, adibidez, pulque izeneko edaria egiteko, eta agavearen barietate batzuk (Agave tequilana) tekiila egiteko ere erabiltzen dira. Bestalde, bere zuntzak (esate baterako, sisala) artisautzan eta sokagintzan erabili izan dira.
Gaur egun, gure museoko sarreran duen presentziak erakusten du natura zein harrigarria den, eta pazientziaren indarraz hitz egiten digu: urte luzeetan hazten, itxaroten, eta azkenik, lore ederrak eskaintzen.
Hurrengo bisitan, geldialdia egin Agavearen aurrean: momentu berezia bizitzen ari da, eta gutxitan ikus daiteke horrelako loraldia.
