webmaster-k Az, 2025-05-21 08:47-n bidalia
Bergarako Udalak egindako eskaerari erantzunez, Mugikortasuneko, Turismoko eta Lurralde Antolaketako Departamentuak Lurraldebuseko gaueko zerbitzuak jarriko ditu herrian, Ekinez jaialdiaz eta Pentekoste jaiez gozatu nahi dutenek modu jasangarri, eroso eta seguruan gozatzeko aukera izan dezaten. Azahara Dominguez diputatuak azaldu duenez, zerbitzu horiek maiatzaren 30etik 31ra bitarteko gauean eta ekainaren 6ko eta 7ko asteburuan jarriko dituzte.
Lehenengo hitzorduari dagokionez, Mugikortasuneko foru arduradunak jakinarazi du, Ekinez Fest dela eta, bi orduz behin zerbitzuak egongo direla Eibartik, 00:00etatik 6: 00etara. Geltokiak Soraluzen, Bergaran, Arrasaten, Aretxabaletan (0: 50ean eta 4: 50ean bakarrik) eta Eskoriatzan (0: 55ean eta 4: 55ean) izango dira. Alderantziz, bi ordutik behin irteerak egongo dira 23:15etik 5: 15era Arrasatetik. Gainera, bi irteera izango dira Eskoriatzatik (1:00 eta 5:00) eta Aretxabaletatik (1:05 eta 5:05).
Bestalde, gaueko zerbitzuak egongo dira Antzuolatik (00:30, 1:30, 2:30, 3:30 eta 5:30) honako ibilbide hau egingo dutenak: Bergara (00:40, 1:40, 2:40, 3:40, 4:40 eta 5:40), Oñati (1:55, 3:55 eta 5:55) eta Elgeta (0:55, 2:55 eta 4:55). Alderantziz, irteerak izango dira: 1:00etan, 3:00etan eta 5:00etan Elgetatik; 00:00etan, 2: 00etan eta 4: 00etan Oñatitik; 00:15ean, 1:15ean, 2:15ean, 3:15ean, 4:15ean eta 5:15ean Bergaratik eta 00:25ean, 1:25ean, 2:25ean, 3:25ean eta 5:25ean Antzuolara iritsiko dira.
Gaueko zerbitzu horiek ekainaren 6tik 7rako gauean errepikatuko dira, Pentekoste jaietarako.
"Beste udalerri batzuetan egiten ari garen bezala, Lurraldebuseko zerbitzu bereziak jarriko ditugu jai hauetaz gozatu nahi duten pertsonak modu eroso, seguru eta ingurumenarekiko errespetuan mugitu ahal izateko. Horrelako ekitaldietan garraio publikoa indartzeak aukera ematen du herritar guztiei aisialdirako sarbidea bermatzeko, norberaren autoa duten ala ez alde batera utzita, eta segurtasuna indartzeko funtsezko neurria da, bereziki gazteen artean", adierazi du Azahara Domínguez diputatuak.
Bestalde, Bergarako alkate Gorka Artolak hurrengoa adierazi du: “Ekinez jaialdira eta Pentekoste jaietara Bergarara joan-etorriak modu eroso eta seguruan egiteko aukera izatea nahi dugu. Horregatik, pozik gaude Lurraldebusekin elkarlanean aritzeari esker gaueko zerbitzu berezi hauek herritarren eskura jarri izateaz. Gure gazteek eta herritar guztiek jaiak modu arduratsuan eta segurtasunez bizi ahal izatea funtsezkoa da. Udaletik zerbitzu hau berrindartzea eskatu genuen, eta pozik gaude erantzuna positiboa izan delako”.
